Imaani avatangiisit illersorneqarnissaat pillugu inatsisartut peqqussutaata allanngortinneqarneranik Inatisartut peqqussutaat nr. 2, 21. maj 2004-meersoq.
(Aalisakkat nassuiaatitaasa allanngortinneqarnerat, umiarsuarnit tunitsiviusunit tunisassiorfiusunillu aalisakkanik eqqaasarneq pillugu malittarisassiornissamut tunngavissiineq kiisalu aalajangersakkanik atorunnaarsitsilluni Imaani angalanermi isumannaallisaanissaq pillugu Inatsimmut nuussineq)

 

§ 1

Imaani avatangiisit illersorneqarnissaat pillugu Inatsisartut peqqussutaanni nr. 4-mi, 3. november 1994-imeersumi inatsisartut peqqussutaatigut nr. 3-kkut, 6. juni 1997-imeersukkut allanngortinneqartumi makku allannguutigitinneqassapput:

1. § 4-mi imm. 3-p kingorna nutaatut ikkunneqassaaq:
"Imm. 4 "aalisakkat" peqqussummi matumani tassaatinneqassapput aalisakkat suulluunniit, peqqukkut, qituttut, tinumasumik amillit, pullangasumik amillit, aamma siuteqqut imarmiut.".

2. §§ 9, 11 aamma 12 atorunnaarput.

3. § 17-imi imm. 1-ip kingorna nutaatut ikkunneqassaaq:
"Imm. 2. Naalakkersuisut umiarsuarnit tunitsiviusunit tunisassiorfiusunillu aalisakkanik nutaanik taakkuluunniit ilaannik igitsineq pillugu malittarisassiorsinnaapput.".

4. § 27, imm. 3 ima oqaasertaqassaaq:
"Imm. 3. Imm. 1-imi 2-milu taaneqartut uuliamik akoorutissanillu mingutitsinermik akiuiniarnermut, imartami suliaqarnernut atatillugu pisunut, Kalaallit Nunaanni atortussiassat aatsitassanit pisut pillugit inatsimmi (atortussiassalerinermik inatsit) ilaasut atuutinngillat. Pisuni taamaattuni aalajangersakkat naleqquttut, atortussiassalerinermut inatsit naapertorlugu aalajangersarneqartut malinneqassapput.".

5. § 28 atorunnaarpoq.

6. § 37, imm. 1 atorunnaapoq.

Imm. 2 taamaalilluni imm. 1-inngorpoq.

7. § 41, imm. 1, nr. 1-imi, " § 9, imm. 1 aamma 3" atorunnaarput.

8. § 41, imm. 1, nr. 2-mi, "§ 11" atorunnaarpoq.

9. § 43-mi "§ 9, imm. 2,"aamma "§ 12, imm. 2," aamma "§ 28, imm. 2," atorunnaarput.

10. § 44, imm. 1 ima oqaasertaqassaaq:
"§ 44. Inatsisartut peqqussutaanni matumani aalajangersakkanik aamma inatsisartut peqqussutaat naapertorlugu aalajangersakkanik atuutilersinneqartunik unioqqutitsisoqartillugu Kalaallit Nunaanni eqqartuussisarneq pillugu inatsimmi misissueqqissaarneq pillugu maleruagassat malillugit uppernarsaatinik ujaasinerit pisinnaapput.".

 

§ 2

Inatsisartut peqqussutaat 1. august 2004-mi atuutilerpoq.

Namminersornerullutik Oqartussat, ulloq 21. maj 2004.

Hans Enoksen

/

Jens Napãtôk’

---

Siullermeerinninnermut siunnersuut

Siunnersuummut nassuiaatit

Isumaliutissiissut (Aappassaaneerinninneq)

Isumaliutissiissut (Pingajussaaneerinninneq)

Pingajussaaneerinninnermut allannguutissatut siunnersuut (akuerineqartoq)